Rayon icra hakimiyyətinin başçısı Qasımbəyli və Nüydü kənd sakinləri ilə səyyar-görüş keçirib

Rayon  icra  hakimiyyətinin  başçısı  Ənvər Seyidəliyev  iyun  ayının  20-də, 21-də keçirilmiş səyyar qəbullar zamanı Qasımbəyli və Nüydü kənd sakinlərini  qəbul  edib. 
  Səyyar qəbullarda hüquq mühafizə orqanlarının, əlaqədar müəssisə və təşkilatların  rəhbərləri  iştirak  ediblər.
  Rayon icra hakimiyyətinin başçısı səyyar qəbulların əhəmiyyətindən danışaraq belə qəbulların əhalini narahat edən problemlərin operativ həllində müstəsna rol oynadığını vurğulayıb. Dövlət başçısının daxili və xarici siyasəti nəticəsində ölkəmizin gündən-günə inkişaf etdiyini bildirib. Cənab İlham Əliyevin rayonumuza göstərdiyi xüsusi diqqət və qayğısından söhbət açan natiq Azərbaycanın digər rayonları kimi, Ağsu rayonunun da ildən-ilə inkişaf etdiyini, abadlaşdığını bildirərək, son illər rayon mərkəzinin inkişafı ilə yanaşı ucqar dağ kəndlərində də yeni məktəb binaları tikildiyini, kənd yolların təmir edildiyini, hazırda isə bir neçə kəndin qazlaşdırılması istiqamətində işlərinin aparıldığını qeyd edib.
  Qəbullarda çıxış edən sakinlər görülən işlərə görə ölkə başçısına dərin minnətdarlıqlarını bildirərək  kənddə hələ də mövcud olan bir sıra sosial problemləri və onları  narahat  edən  yerli  məsələləri  qeyd ediblər.
  Görüşlərdə vətəndaşlar tərəfindən əsasən elektrik təsərrüfatında və    kənd yollarında təmir işlərinin aparılması, suvarma suyu ilə təminatın yaxşılaşdırılması, kənd təsərrüfatı işlərinə kömək göstərilməsi, ərazinin abadlaşdırması və digər sosial məsələlərin həlli qaldırılıb. Qeyd olunan problemlər nəzarətə götürülüb və onların həlli ilə bağlı rayon icra hakimiyyəti başçısı tərəfindən aidiyyəti vəzifəli şəxslərə müvafiq  tapşırıqlar  verilib.
  Nüydü kəndində  keçirilən  səyyar  qəbulda  iştirakı  zamanı  Milli  Məclisin deputatı Tahir Kərimli sakinlər qarşısında çıxış edib.