Ağsu rayonunda “8 Mart - Beynəlxalq Qadınlar Günü” qeyd olunub

     Martın 7-də Ağsu Rayon İcra Hakimiyyətində  “8 Mart - Beynəlxalq Qadınlar  Günü” münasibətilə  görüş keçirilib. Tədbirdə  Ağsu Rayon  İcra  Hakimiyyətinin  başçısı Rövşən Bağırov, şəhid ailələri, eləcə də rayonun ictimai-siyasi həyatında fəallıq göstərmiş qadınlar iştirak ediblər.

     Tədbirdə çıxış edən Rövşən Bağırov  bu əlamətdar  gün  münasibəti  ilə  tədbirə  toplaşan  qadınları  və  onların simasında rayonun bütün qadınlarını, analarını təbrik etdi, onlara xoşbəxtlik və səadət arzuladı.  O, öz çıxışında vurğuladı ki, qadınlarımız ölkənin bütün ali orqanlarında əzmlə, məsuliyyətlə çalışırlar. Birinci vitse-prezident Mehriban xanım Əliyeva və Heydər Əliyev Fondunun vitse-prezidenti Leyla xanım Əliyevanın ölkənin ictimai-siyasi həyatındakı uğurlu fəaliyyəti, dövlətimiz, dövlətçiliyimiz naminə, xalqın rifahı üçün gördükləri işlər, xeyirxah əməllər bu gün Azərbaycan qadınının nə qədər fəal olduğunu təsdiq edir. RİH başçısı xüsusilə qeyd etdi ki, bu il də Azərbaycan qadını Beynəlxalq Qadınlar gününü daha qürurlu qeyd edir. Çünki, onun Vətən üçün sağlam ruhda böyüdüb boya-başa çatdırdığı övladları 30 illik düşmən işğalına 44 gündə son qoydu.

     Çıxış edənlər Azərbaycan qadınının tarix boyu müdrikliyi, işgüzarlığı və saflığı ilə parlaq səhifələr yazdıqlarından bəhs etdilər. Mərasim iştirakçıları ölkəmizdə qadınlara, analara göstərdikləri yüksək diqqət və qayğıya görə Respublika Prezidenti cənab İlham Əliyevə və Birinci vitse-prezidenti Mehriban xanım Əliyevaya minnətdarlıqlarını bildiriblər.

     Tədbirin sonunda rayonun ictimai-siyasi həyatında fəallıq göstərmiş bir qrup qadınlar Ağsu Rayon İcra Hakimiyyətinin Fəxri Fərmanı ilə təltif olunmuş və şəhid ailələrindən olan qadınlara hədiyyələr verilmişdir.