Meliorasiya və Su Təsərrüfatı ASC-nin sədri Ağsu rayonunda vətəndaşları qəbul edib

Mərkəzi icra hakimiyyəti orqanları rəhbərlərinin 2022-ci ilin mart ayında şəhər və rayonlarda vətəndaşların qəbulu cədvəlinə uyğun olaraq, Azərbaycan Meliorasiya və Su Təsərrüfatı ASC-nin sədri Zaur Mikayılov martın 10-da Ağsu şəhərində Ağsu, İsmayıllı, Şamaxı və Qobustan rayonlarından olan vətəndaşları fərdi qaydada qəbul edib.
  Əvvəlcə Meliorasiya və Su Təsərrüfatı ASC-nin sədri Zaur Mikayılov və Ağsu Rayon İcra Hakimiyyətinin başçısı Rövşən Bağırov Ümummilli lider Heydər Əliyevin abidəsini ziyarət edib, önünə gül dəstələri düzərək, Ulu Öndərin əziz xatirəsinə ehtiramlarını bildiriblər.
  Sonra Meliorasiya və Su Təsərrüfatı ASC-nin sədri Zaur Mikayılov Ağsu Suvarma Sistemləri İdarəsinin inzibati binasında Ağsu, İsmayıllı, Şamaxı və Qobustan rayonlarından olan vətəndaşlarla görüşüb, onların müraciətlərini dinləyib. Müraciətlər əsasən suvarma suyuna tələbatın ödənilməsi, suvarma kanallarının beton üzlüyə alınması, yeni subartezian quyularının qazılması, sel sularına qarşı mühafizə bəndlərinin tikilməsi, nov kanallarının qurulması, habelə cəmiyyətin səlahiyyətlərinə aid olmayan bir sıra məsələləri əhatə edib.
  Qəbulda hər bir vətəndaşın müraciətini dinləyən ASC-nin sədri şikayətlərin qısa müddətdə araşdırılaraq zəruri tədbirlərin görülməsi barədə qəbulda iştirak edən məsul işçilərə müvafiq tapşırıqlar verib. Vətəndaşlar tərəfindən qaldırılan məsələlərin bir qismi yerində həll olunub, araşdırılmasına ehtiyac olan müraciətlər nəzarətə götürülüb. ASC-nin səlahiyyətlərinə aid olmayan məsələlər isə aidiyyəti qurumlara göndəriləcək.
  Vətəndaşlar, o cümlədən İsmayıllıdan Zahir Məhərrəmov, Ağsu rayonunun Şahbəyli kəndindən Eldar Yadigarov və digərləri bölgələrdə vətəndaşların qəbulu və müraciətlərinə baxılması üçün rahat və əlverişli şərait yaradılmasından razılıqlarını dilə gətirərək, göstərilən diqqət və qayğıya görə Prezident cənab İlham Əliyevə minnətdarlıqlarını bildiriblər.