Şimal-qərb turizim koridoru-kommersiya obyektlərinin inkişaf konseptinə uyğun tikinti-quraşdırma işləri uğurla davam etdirilir

Ölkəmizdə qeyri-neft sektorunun inkişafına göstərilən dövlət qayğısı həm də, turizm potensialından maksimum istifadəni ön plana çəkir. Bu baxımdan nəinki respublikada, həmçinin flora və faunası, tarixi, maddi-mədəniyyət abidələri ilə zəngin olan Ağsu rayonunda da böyük layihələr reallaşdırılır. 
  Belə ki, Bakı-Şamaxı-Yevlax magistral avtomobil yoluna daxil olan, ilin bütün fəsillərində gözəlliyi ilə diqqəti cəlb edən “Ağsu dolayları” kimi tanınan ərazisində və Muğanlı-İsmayıllı yolunun rayon sərhədləri daxilindən keçən hissələrində yol kənarlarında yerləşən zövqsüz, tikinti qayda və normalarına uyğun olmayaraq inşa edilmiş kafe, restoran, istirahət guşələri və sair tikililər sökülərək əvəzində yeni obyektlərin tikintisi məqsədilə sahibkarlara ən müasir layihələr təqdim edilib. Hazırda sahibkarlar Şimal-qərb turizim koridoru-kommersiya obyektlərinin inkişaf konseptinə uyğun olaraq tikinti-quraşdırma işlərini böyük ruh yüksəkliyi ilə uğurla davam etdirirlər. 
  Bakı-Şamaxı-Yevlax magistral avtomobil yolunun 144-158-ci kilometrini təşkil edən Ağsu dolaylarında sahibkarlıq obyektlərinin yenidən qurulması sakinlərin və turistlərin təhlükəsizliyi baxımından da zəruridir. Belə ki, 14 kilometrlik dolaylarda 17 sürüşmə zonası var, hətta 147-149-cu kilometrlərdə yolda və ərazinin iki yerində sürüşmə ikitərəflidir. Bu ərazidəki bir sıra sahibkarlıq obyektləri məhz sürüşmə zonasında olmuşdur ki, bu da köhnə tikililər üçün çox təhlükəli idi. Yeni layihələrdə bütün bunlar nəzərə alınmışdır.
  Ağsu dolaylarında və Muğanlı-İsmayıllı magistral avtomobil yolunun rayon ərazisindən keçən hissələrində müasir layihələr əsasında aparılan tikinti və yenidənqurma işləri nəticəsində yeni yaranacaq sahibkarlıq obyektləri tezliklə həm rayon sakinlərinə, həm də turistlərə istirahət və asudə vaxtlarını səmərəli keçirmələri istiqamətində böyük tövhə olacaqdır.