Ağsuda kənd təsərrüfatının inkişafı diqqət mərkəzindədir

Ağsu şəhərindən cənub-qərbdə yerləşən  Cavanşır su anbarı Ağsuçaydan qidalanır. 1961-cu ilə qədər təbii göl kimi mövcud olan Cavanşır gölünün ətrafına torpaq bənd çəkilərək su anbarı yaradılmışdır. İstismara  verilərkən bəndin hündürlüyü 15 m, uzunluğu 2680 m və su anbarının həcmi isə 4.6 milyon m3  olub.
Hal-hazırda Cavanşir su anbarı rayonun 9 kəndi  üzrə 3200 hektar ərazisini suvarma suyu ilə təmin edir. Ümumilikdə 75 hektar ərazini əhatə edən su anbarı xeyli lillənib və tutumu xeyli  azalaraq 3 milyon kubmetrdən   aşağı  düşüb.
Su ehtiyatlarının qıtlığı Ağsu  rayonunda yaranışından  yaşanan  problem  olub, quru iqlimə malik zonada yerləşdiyinə görə burada kənd təsərrüfatının inkişafı süni suvarma aparılmadan  mümkün  olmayıb. Ötən  illərdə  mərhələlərlə  Yuxarı  Şirvan  Kanalının, Yuxarı  Şirvan  Kanalının  Maşın  qolu  kanalının, Nasos  Stansiyasının,  hidrotexniki  qurğuların istismara  verilməsi  və  digər zəruru  tədbirlər  nəticəsində bu  problem  qismən  də  olsa  həllini  tapmışdır.
Cari ilin isti və quraq keçən yay aylarında Cavanşir su anbarının  suyu  tükənərək demək olar ki, qurumuşdu. Hazırda anbarın doldurulması istiqamətində tədbirlər görülür.
Cavanşir su anbarı Ağsu çayından Ömər-Lahıc adlanan kanal vasitəsilə doldurulur. Son vaxtlar havaların yağmurlu keçməsi çayda güclü su axınına səbəb olub. Buradan axıdılan su artıq anbarda xeyli ehtiyatın yaranması ilə nəticələnib. Artıq anbara 2,5 milyon kubmetrədək su yığılıb. Cavanşir su anbarının tamamilə doldurulması istiqamətində işlər davam etdirilir.