Şair Sabir Savanla Ağsu rayon ictimaiyyətinin görüşü keçirildi

22 noyabr 2014-cü il tarixdə  Ağsu rayon Mədəniyyət Sarayında Azərbaycan Yazıçılar Birliyinin üzvü, Azərbaycan Yazıçılar Birliyi Sumqayıt bölməsinin sədri, şair Məlikov Sabir Soltan oğlu ilə  (Sabir Sarvan)  Ağsu rayon ictimaiyyətinin görüşü keçirildi.  Tədbir  iştirakçıları  ilk  öncə  rayonunun  mərkəzindəki Heydər Əliyev parkında ulu öndərin abidəsi  önünə  tər  çiçək  dəstələri qoyaraq xatirəsini ehtiramla yad etdilər.
           Ağsu rayon İcra Hakimiyyətinin başçısı Ənvər Seyidəliyev tədbiri giriş sözü ilə açaraq şair Sabir Sarvanın həyat və yaradıcılığı, vətəndaş mövqeyi, torpaq, millət təəssübkeşliyi ilə köklənmiş poeziyası  haqqında  məlumat  verdi.
           Sabir Sarvan 1956-cı il mart ayının 5-də Ağsu rayonunun Pirhəsənli kəndində anadan olmuşdur. 1971-ci ildə  Sarvan kənd səkkizillik məktəbini, 1973-cü ildə   Növcü kənd  orta  məktəbini  bitirmişdir. İlk mətbu əsəri olan ”Vüqar” adlı şeiri 1970-ci ildə  Ağsu rayonunda nəşr olunan “Birlik” qəzetində çap olunmuşdur. 1977-ci ildə M. A. Əliyev adına Azərbaycan Dövlət İncəsənət İnstitutunun (indiki İncəsənət Universiteti) Dram  və  kino  aktyorluğu  fakultəsini  bitirmişdir.  1977-1980-ci illərdə N. B. Vəzirov adına Lənkəran Dövlət Dram Teatrında, 1981-1987-ci illərdə  isə Bakıda Tədris Teatrında aktyor işləmişdir. 1988-1993-cü illərdə jurnalist kimi fəaliyyətə başlamış, demokratik mətbuatın ilk qaranquşu sayılan “Gənclik” -  “Molodost” jurnalında ədəbi işçi, şöbə müdiri, baş redaktorun müavini vəzifələrində çalışmış,          1996-cı ildən hal-hazıra  kimi  Azərbaycan Yazıçılar Birliyi Sumqayıt Bölməsinin sədri vəzifəsində çalışır.
         ”Gördüyüm göy, baxdığım işıq”, ”Çıx qaranlıqdan”, ”Gəldi qürub”, ”Özümü sözə çevirdim”,  “Dərdimi oxusun ney”  adlı  şeir  kitablarının müəllifidir.
          Şair-publisist Əjdər Ol Sabir Sarvanın həyat və yaradıcılığından, onunla tanışlığından və çoxillik dostluğundan danışmışdır.
         Tədbirə toplaşanlar Azərbaycan Yazıçılar Birliyinin katibi, yazıçı-jurnalist Rəşad Məcidin xatirələrini maraqla dinləmişlər.
         Görüşdə şair-tərcüməçi Məmməd Aslan, əməkdar artist, bədii qiraət ustası Ağalar Bayramov, filologiya elmləri doktoru Əzizxan Tanrıverdi, xanəndələr - əməkdar artist Elnarə  Abdullayeva,  Abgül Mirzəliyev  iştirak etmişlər.
        Tədbirdə şair Sabir Sarvanın şeirləri böyük maraqla dinlənilmişdir.
       

Tədbirin keçirilməsinə Mədəniyyət və Turizm Nazirliyinin  08 sentyabr 2014-cü il tarixli, 2427/11 saylı məktubu ilə razılıq verilmişdir.