Rayon icra hakimiyyətinin başçısı Bəyimli kənd sakinləri ilə səyyar görüş-qəbul keçirib
Ağsu rayon icra hakimiyyətinin başçısı hüquq mühafizə orqanlarının, əlaqədar idarə və təşkilat rəhbərlərinin iştirakı ilə Bəyimli kənd sakinlərini qəbul edib.
Vurğulanıb ki, ölkə başçısının tapşırığına əsasən bilavasitə yaşadığı yerlərdə vətəndaşlarla keçirilən görüşlər onların qarşılaşdığı çətinliklərin və problemlərinin operativ qaydada həllinə kömək edir.
Səyyar qəbulda çıxış edən sakinlər görülən işlərə görə ölkə başçısına dərin minnətdarlıqlarını bildirərək kənddə hələ də mövcud olan bir sıra sosial problemləri və onları narahat edən yerli məsələləri diqqətə çatdırıblar.
Görüşdə vətəndaşlar tərəfindən içməli və suvarma suyu ilə təminatın yaxşılaşdırılması, kənd təsərrüfatı işlərinin sürətləndirilməsinə kömək göstərilməsi və digər sosial məsələlərin həlli qaldırılıb. Qeyd olunan məsələlər nəzarətə götürülüb və onların həlli ilə bağlı rayon icra hakimiyyəti başçısı tərəfindən aidiyyəti vəzifəli şəxslərə müvafiq tapşırıqlar verilib.
.jpg)
