Ağsu rayonunda 2013-cü ilin sosial-iqtisadi inkişafının yekunları və 2014-cü ildə qarşıda duran vəzifələrə həsr olunmuş hesabat yığıncağı keçirilmişdir
Ağsu rayonunda 2013-cü ilin sosial-iqtisadi inkişafının yekunlarına və 2014-cü ildə qarşıda duran vəzifələrə həsr olunmuş hesabat yığıncağı keçirilmişdir. İlk öncə tədbir iştirakçıları Heydər Əliyev parkına gələrək Ümumilli liderin abidəsi önünə tər çiçəklər düzmüşlər.
Sonra Mədəniyyət sarayının foyesində sosial-iqtisadi inkişafı əks etdirən stendlərin və rayonda istehsal olunan kənd təsərrüfatı və sənaye məhsulların sərgisinə baxış keçirilmişdir. Daha sonra Mədəniyyət sarayında təşkil olunan hesabat yığıncağını rayon icra hakimiyyətinin başçısı Ənvər Seyidəliyev açaraq 2013-cü ildə Ağsu rayonunda sosial-iqtsadi sahədə görüımüş işlər barədə ətraflı məruzə etmişdir. O demişdir:
Hörmətli qonaqlar,
Hörmətli yığıncaq iştirakçıları,
Azərbaycan Respublikasının Prezidenti cənab İlham Əliyevin rəhbərliyi ilə 2013-cü ildə ölkəmizin dinamik inkişafı təmin edilmiş, qarşıda duran bütün məsələlər öz həllini tapmışdır. Ölkədə böyük layihələr icra edilmiş, ölkəmizin beynəlxalq nüfuzu artmışdır.
2013-cü ildə Azərbaycanın həm ikitərəfli və həm də çoxtərəfli formatda beynəlxalq əlaqələri genişlənmiş və güclənmişdir. Azərbaycanın BMT Təhlükəsizlik Şurasındakı fəaliyyəti başa çatmış, iki il ərzində beynəlxalq birlik tərəfindən Azərbaycana olan inam və dəstək daha da artmışdır. Azərbaycan bütün beynəlxalq təşkilatlarda prinsipial mövqeyini və öz milli maraqlarını hər şeydən üstün tutmuşdur.
Ordu quruculuğu ilə bağlı önəmli addımlar atılmış, Azərbaycan ordusunun döyüş qabiliyyəti böyük dərəcədə artmışdır. Erməni işğalından əziyyət çəkən soydaşlarımızın problemlərinin həlli istiqamətində işlər davam etdirilmiş, 20 min köçkün yeni evlərə, mənzillərə köçürülmüşdür.
Keçən il regionların inkişafına dair ikinci Dövlət Proqramının icrası başa çatmışdır. Hər iki proqramın icrası bölgələrdə ciddi dönüşün yaranmasına səbəb olmuşdur.
İqtisadi sahədə son on il ərzində Azərbaycan kimi inkişaf edən ikinci ölkə olmamışdır. Ümumi daxili məhsul təxminən 6 faiz artmışdır. Bu, çox böyük göstəricidir. Halbuki bu gün dünyanın əksər ölkələrində ümumi daxili məhsul yarım faiz, 1 faiz, 1,5 faiz artır. Qeyri-neft sektoru 10 faiz artmışdır. İl ərzində ölkə iqtisadiyyatına 28 milyard dollar investisiya qoyulmuşdur ki, bunun da 17,5 milyard dolları daxili sərmayədir.
Keçən il valyuta ehtiyatları artaraq 50 milyard dollara çatmışdır. Bu da ümumi daxili məhsulun 70 faizini təşkil edir.
İşsizliklə bağlı olan problemlər öz həllini tapmışdır. 110 min yeni iş yeri açılmışdır ki, onlardan 80 mini daimi iş yeridir. İşsizliyin səviyyəsi 5 faizə, yoxsulluğun səviyyəsi isə 5,3 faizə düşmüşdür.
Əhalinin pul gəlirləri 8 faiz artmışdır. İnflyasiya isə cəmi 2,4 faiz olmuşdur. Əhalinin pul gəlirləri inflyasiyanı 3 dəfədən çox üstələmişdir. Bu onu deməyə əsas verir ki, vətəndaşların rifah halı yaxşılaşıb və müsbət dinamika burada da özünü göstərib.
2013-cü ildə maaşlar və pensiyalar qaldırılmış, sovet vaxtından qalan əmanətlərin kompensasiya şəkilində əhaliyə verilməsi prosesi başa çatmışdır. MDB məkanında bu əmanətlərin kompensasiya şəklində verilməsində Azərbaycan təcrübəsi birinci yerdədir.
Keçən il qeyri-neft sektorunun inkişafı ilə bağlı çox ciddi addımlar atılmışdır. 2013-cü il Azərbaycanda kosmik sənayenin yaranması ili kimi tarixdə qalacaqdır. Təsadüfi deyil ki, 2013-cü il “İnformasiya-kommunikasiya texnologiyaları ili” elan edilmişdir. Birinci Azərbaycan peyki “Azərspace-1” fəzaya qaldırılmışdır.
Qeyri-neft sektorunun əsas istiqamətlərindən biri olan kənd təsərrüfatı təxminən 5 faiz artmışdır. 2014-cü ildə və ondan sonrakı illərdə kənd təsərrüfatının inkişafı ilə bağlı daha da böyük işlər görüləcəkdir. Dövlət investisiyaları, infrastruktur layihələri, xüsusilə suvarma ilə bağlı olan layihələr kənd təsərrüfatının inkişafına yeni təkan verəcəkdir.
Ərzaq təhlükəsizliyinin təmin edilməsində son illərdə böyük addımlar atılmışdır, idxaldan asılılığımız böyük dərəcədə azalmışdır. Bu gün Azərbaycanda bütün əsas ərzaq məhsulları istehsal edilir. Növbəti 5 il ərzində ərzaq təhlükəsizliyi ilə bağlı olan bütün məsələlər həll olunacaqdır.
İnfrastruktur layihələrinin içində hazırda ən böyük önəm daşıyan layihələr içməli su, kanalizasiya layihələridir. Qazlaşdırma ilə bağlı olan layihələr davam etdirilir. Bütövlükdə ölkə üzrə qazlaşdırmanın səviyyəsi 95 faizə çatmalıdır;
Ötən il elektrik enerjisi ilə bağlı əsas məsələlər öz həllini tapmışdır. Təxminən 800 meqavata yaxın gücü olan “Cənub” Elektrik Stansiyası istifadəyə verilmişdir ki, bu, bütün cənub zonasının tələbatını təmin edəcəkdir. Hazırda Bakıda “Şimal-2” Elektrik Stansiyasının tikintisi davam etdirilir və bu il istifadəyə veriləcəkdir. Orada da təqribən 400 meqavata yaxın elektrik gücü yaranacaqdır. Bərpa olunan enerji mənbələrinin yaradılması ilə bağlı işlər gedir və müəyyən layihələr icra edilir, xüsusilə su elektrik stansiyaları tikilir.
Respublikada qlobal nəqliyyat layihələri icra edilir. Bakı-Tbilisi-Qars dəmir yolunun tikintisi gedir. Gəmiqayırma zavodunun açılışı həm sənaye, həm qeyri-neft, həm də nəqliyyat sektorunun güclənməsinə xidmət göstərəcəkdir. Bu il Ələt Dəniz Ticarət Limanının birinci mərhələsinin açılışı olacaqdır. Dəmir yolunun, hava nəqliyyatının yenilənməsi prosesi gedir. Həm magistral yollar, həm də dörd yüz yaşayış məntəqəsini birləşdirən kənd yolları çəkilmişdir. Yerli icra orqanları vətəndaşların müraciətləri əsasında bu işləri görür.
Azərbaycan Respublikasının Prezidenti cənab İlham Əliyev 2014-cü ili “Sənaye ili” elan etmişdir. Bu il ölkəmizin gələcək inkişaf dinamikasını müəyyən edən sənaye sahəsinə daha da böyük diqqət veriləcəkdir.
2014-cü ildə metallurgiya sənayesinin inkişafı ilə bağlı ciddi addımlar atılacaq, yerli xammal, təbii resurslar müasir metallurgiya kombinatının tikintisi çox böyük bir nailiyyət olacaqdır.
2013-cü ildə ölkəmizin ictimai-siyasi həyatında önəmli hadisə baş vermişdir - Prezident seçkiləri keçirilmişdir. Avropa Şurası, Avropa İttifaqı, ATƏT-in Parlament Assambleyası, İslam Əməkdaşlıq Təşkilatı, MDB və digər mötəbər təşkilatlar seçkilərin keçirilməsini birmənalı olaraq yüksək qiymətləndirmişlər. Səsvermə günü və səsvermədən sonrakı dövrdə cəmiyyətdə hökm sürən yüksək əhval-ruhiyyə bir daha seçkilərin nə qədər şəffaf, ədalətli keçirilməsini təsdiqləyir.
Hörmətli yığıncaq iştirakçıları,
2013-cü ildə respublikanın bütün bölgələrində olduğu kimi Ağsu rayonunda da inkişaf və tərəqqi meylləri davam etdirilmişdir. Azərbaycan Respublikası regionlarının sosial-iqtisadi inkişafına dair birinci və ikinci Dövlət Proqramlarında nəzərdə tutulmuş tədbirlərin uğurla həyata keçirilməsi rayonun sosial-iqtisadi inkişafında keyfiyyətcə yeni mərhələnin başlanğıcını qoymuşdur.
Həyata keçirilən abadlıq, tikinti-quruculuq işləri sayəsində iqtisadiyyatın ayrı-ayrı sahələrinə qoyulan investisiyanın məbləği 2003-cü illə müqayisədə 158 dəfə artaraq ötən il 44,4 milyon manata çatmışdır.
2013-cü ildə yeni obyektlərin tikilməsinə və istifadəyə verilməsinə diqqət artırılmışdır. təhsil, səhiyyə, mədəni-məşət obyektlərinin inşası hər il olduğu kimi nəzarətdə saxlanmışdır. Qəşəd və Rəhimli kənd tam orta məktəbləri üçün 180 şagird yerlik müasir binalar tikilib istifadəyə verilmiş, Dilman, Muradlı kənd tam orta, Keşdiməz kənd ümumi orta məktəbləri üçün binalarda tikinti-quraşdırma işləri davam etdirilmişdir. Regional Dövlət Proqramlarının icra olunduğu müddətdə dövlət vəsaiti hesabına və Heydər Əliyev Fondu tərəfindən şagird yerlərinin ümumi sayı 4244 olan 19 yeni məktəb binası inşa olunmuşdur.
Hesabat ilində rayonun Çiyni kəndində 60 yerlik müasir bağça binası inşa olunmuşdur.
Son illərdə Kalva kənd sahə xəstəxanası üçün 15 çarpayı-yerlik yeni bina inşa olunmuş, Azərbaycan Kənd İnvestisiya Layihəsi çərçivəsində Padar kəndində həkim məntəqəsi binası tikilib, Çaparlı kəndində isə əsaslı təmir olunaraq istifadəyə verilmiş, Yaponiya Hökumətinin “Ot Kökləri və İnsan Təhlükəsizliyi Qrant Yardımı Proqramı” əsasında Ərəbmehdibəy kəndində həkim məntəqəsi binası əsaslı təmir edilmişdir. Dövlət başçısı cənab İlham Əliyevin 2011-ci ildə rayonumuza səfərindən sonra onun müvafiq Sərəncamları ilə ayrılmış vəsait hesabına rayon Mərkəzi xəstəxanası üçün 145 çarpayı yerlik müasir tipli binada ötən il tikinti-quraşdırma işləri davam etdirilmişdir.
Yol infrastrukturunun təzələnməsi sahəsində işlər də diqqət mərkəzindədir. 2012-ci ildən inşasına başlanan rayonun 15 kəndinin əhalisinin istifadə etdiyi uzunluğu 25,6 kilometr olan Ağsu-Çaparlı-Göylər avtomobil yolunda əsaslı təmir və yenidənqurma işləri başa çatdırılmışdır.
2013-cü ildə Ağsu şəhərində abadlaşdırma işləri geniş vüsət almış, təmir – tikinti işlərinə 1 milyon 358 min manat vəsait yönəldilmişdir. Heydər Əliyev, Ü.Hacıbəyov, Azərbaycan, M.Ə.Rəsulzadə, Nizami, Natəvan, S.Vurğun, Vidadi, T.İsmayılov küçələrində, Qəhrəmanlar parkında, piyada səkiləri yenidən qurulmuş və küçə hasarlarında dekorativ tərtibat işləri aparılmış, avtomobil yollarına 65,5 min kvadratmetr asfalt örtük salınmışdır.
Müəssisə və təşkilatlarda çalışanların iş şəraitinin yaxşılaşdırılması üçün tədbirlər davam etdirilmişdir. “Aqrolizinq” Açıq Səhmdar Cəmiyyətinin “Aqroservis” filialı üçün istehsalat bazasının tikintisi başa çatmış, Dövlət Miqrasiya Xidmətinin regional idarəsi, Səfərbərlik və Hərbi Xidmətə Çağırış üzrə Dövlət Xidmətinin rayon şöbəsi üçün yeni inzibati binaların inşasında son tamamlama işləri görülür.
Gənclərin və yeniyetmələrin asudə vaxtlarını səmərəli keçirmələrinə və idmanın müxtəlif növləri ilə məşğul olmalarına imkan verən İdman Kompleksində tikinti-quraşdırma işləri hesabat ilində davam etdirilmişdir.
2013 – cü ildə Azərbaycan Kənd İnvestisiya Laihəsi çərçivəsində rayonin 13 kəndində yolların, səhiyyə müəssisəsinin təmiri və abadlaşdırma işləri görülmüşdür.
Son illərdə rayonda miqyasına görə ən böyük layihə Dünya Bankı və Azərbaycan Hökuməti ilə birgə maliyyələşdirilən 50 milyon ABŞ dolları dəyərində “Milli Su Təchizatı və Kanalizasiya xidmətləri üzrə İkinci Layihə” çərçivəsində Ağsu şəhərinin su təchizatının yenidən qurulması və kanalizasiya sisteminin yaradılmasıdır.
Hörmətli yığıncaq iştirakçıları,
Həyata keçirilən məqsədyönlü tədbirlər nəticəsində rayonda məhsul buraxılışının ümumi həcmi 2012-ci illə müqayisədə 3,2 faiz artaraq ötən il 150,4 milyon manata çatmışdır. Hazırda rayonda 5 kənd təsərrüfatı, 17 fərdi sahibkarlıq müəssisəsi fəaliyyət göstərir.
Heyvandarlıqda yüksək məhsuldar mal-qaranın yetişdirilməsi üçün damazlıq işlərinin təşkili sahəsində müəyyən işlər görülmüş, 2013-cü ildə süni yolla mayalandırılmış 1169 inəkdən 1119 bala alınmışdır.
Rayonda torpaqların meliorativ vəziyyətinin yaxşılaşdırılması sahəsində çətinliklər vardır. Hazırda 6700 hektar sahədə yeni kollektor-drenaj şəbəkəsinin tikilməsinə, 14412 hektar sahədə kollektor-drenaj, 9250 hektar sahədə suvarma şəbəkələrinin yenidən qurulmasına, 12621 hektar sahədə toraqların yuyulmasına, 12233 hektar sahədə yuma rejimli suvarmaların aparılmasına ciddi ehtiyac vardır.
Rayonda sənaye sahəsinin, xüsusilə də kənd təsərrüfatı məhsullarının emalı sənayesinin maddi-texniki bazası möhkəmləndirilmişdir. 2011-ci il oktyabr ayının 30-da açılış mərasimində Azərbaycan Respublikasının Prezidenti cənab İlham Əliyevin iştirak etdiyi “Az-Granata” MMC-nin Şirə və şərab emalı zavodunda ötən il 3 milyon 468 min manatlıqdan çox şirələr və şərab istehsal olunmuşdur ki, bu, 2012-ci illə müqayisədə 1 milyon 834 min manat çox olmaqla ümumi sənaye məhsulunun 65,6 faizini təşkil edir.
Regional Dövlət Proqramının uğurla həyata keçirilməsi nəticəsində 2013-cü ildə rayonda 385 yeni iş yeri açılmışdır. Muzdla işləyənlərin orta aylıq əmək haqqı 2012-ci illə müqayisədə 4,7 faiz artaraq 248,5 manata, əhalinin hər nəfərinə 2161 manat gəlir əldə edilmişdir.
Sahibkarlıq fəaliyyəti ilə məşğul olanlara dövlət tərəfindən hərtərəfli dəstək verilir. Təkcə 2013-cü ildə Sahibkarlığa Kömək Milli Fondu tərəfindən rayonda 81 sahibkara 955,5 min manat məbləğində güzəştli kreditlər verilmişdir. Həyata keçirilmiş layihələrdən sonra rayonda əlavə olaraq 135 yeni iş yeri yaradılacaqdır. Kreditlərin verilməsi 2012-ci illə müqayisədə 174,2 min manat, yaxud 22,3 faiz artmışdır. Ümumilikdə sahibkarlıq subyektlərinə indiyədək 4 milyon 852 min manat güzəştli kreditlər verilmişdir.
Hesabat ilində buğda istehsalçılarının maddi marağının artırılması və buğda istehsalının stimullaşdırılması məqsədilə, həmçinin kənd təsərrüfatı məhsullarının istehsalçılarına əkin sahələrinin becərilməsində istifadə olunan yanacaq və motor yağlarına görə dövlət büdcəsinin vəsaiti hesabına 2 milyon 463 min manat məbləğində yardımın verilməsi təmin edilmişdir.
Azərbaycan Respublikası regionlarının sosial-iqtisadi inkişafı Dövlət Proqramlarının icrasına həsr olunmuş 05 fevral 2014-cü il tarixldə keçirilmiş konfransda dövlət başçısı cənab İlham Əliyev yekun nitqində subsidiyaların verilməsi sahəsindəki vəziyyətlə bağlı qeyd etmişdir ki, “Subsidiyaların verilməsində tam şəffaflıq təmin edilməlidir, burada biz şəffaflığa nail olmamışıq, bu mənim son xəbərdarlığımdır, subsidiyaların verilməsində tam şəkildə nəzarət-uçot sistemi yaradılmalıdır ” Ölkə Prezidentinin tapşırıq və tövdsiyyələri rəhbər tutularaq cari ildə bu məqsədlə əkin sahələrinin uçotunun aparılmasında və müvafiq sənədlərin hazırlanmasında şəffaflıq təmin edilməli, qanun pozuntularına yol verilməməli və kənd təsərrüfatının inkişaf etdirilməsi məqsədi ilə fermer təsərrüfatlarına yardım edilməlidir.
Hörmətli toplantı iştirakçıları!
Ötən il bələdiyyələrin büdcəsinə ümumilikdə 281,7 min manat pul daxil olmuş və proqnoz 46,2 faiz yerinə yetirilmişdir. Yerli düdcəyədaxilolmaların 48,1 min manatını, yaxud 17,1 faizini dövlət tərəfindən verilmiş dotasiya təşkil edir. Mədaxilin ümumi məbləğində torpaq vergisindən və torpaq icarəsindən daxilolmaların xüsusi çəkisi cəmi 25,1 faiz təşkil etmişdir.
2012-ci illə müqayisədə hesabat ilində rayon büdcəsinin mədaxili 36,8 faiz artaraq proqnoz tapşırığı 100,6 faiz yerinə yetirilmişdir. Yerli gəlirlər üzrə proqnoz da yerinə yetirilmiş, rayon büdcəsinə 3 milyon manat, yaxud nəzərdə tutulduğundan 6,7 faiz çox pul daxil olmuşdur. Yerli gəlirlər 2012-ci ildəkindən 17,7 faiz artmışdır.
Əhalinin həyat səviyyəsinin yüksəldilməsi və sosial müdafiəsinin gücləndirilməsi məqsədilə aparılan işlər 2013-cü ildə diqqət mərkəzində saxlanmışdır. İl ərzində Əhalinin Sosial Müdafiəsi Mərkəzinə 1861 ailə müraciət etmiş və onlardan 1586-nın sənədləri qeydə alınmışdır. Ünvanlı dövlət sosial yardımı haqqında Azərbaycan Respublikasının qanunvericiliyinə müvafiq olaraq 7457 nəfəri əhatə edən 1579 ailəyə ünvanlı dövlət yardımı təyin edilmişdir.
Dövlət Sosial Müdafiə Fondu rayon şöbəsi tərəfindən 2013-cü ildə əvvəlki illə müqayisədə 145,4 min manat, yaxud 6 faiz çox sosial sığorta haqları toplansa da proqnoz tapşırığı yerinə yetirilməmişdir. Sosial sığorta ödənişləri 2 milyon 568 min manat təşkil etmişdir ki, bu, tapşırığın 92 faizini təşkil edir.
Son illər rayonda elektrik və qaz təsərrüfatının, əhalinin su təchizatının, yol infrastrukturunun təzələmməsi sahəsində xeyli iş görülmüşdür. Ağsu şəhərində və Çiyni kəndində elektrik verilişi xətləri SİP markalı müasir kabellərlə əvəz olunmuş və Smart-Kart tipli sayğaclar quraşdırılmışdır.
Bununla yanaşı kənd yaşayış məntəqələrində elektrik təsərrüfatının işində ciddi problemlər qalmaqdadır. Əksər yerlərdə elektrik enerjisinin ötürülməsi texniki norma və şərtlərin pozulması ilə aparılır. Enerji haqlarının toplanması sahəsində 2013-cü ildə xeyli dönüş olmuşdur. Belə ki, şəbəkə üzrə yığım 100 %, əhali qrupu üzrə isə 97,2 faiz yerinə yetirilmişdir.
Yaşayış məntəqələrinin qazlaşdırılması davam etdirilmişdir. Ötən il 14 kəndə təbii qaz verilişi bərpa olunmuş, 7 kənddə - Ərəbmehdibəy, Qasımbəyli, Dədəli, Xəlilli, Mustafalı, Çaparlı və Qiyaslı kəndlərində tikinti-quraşdırma işləri davam etdirilmişdir. 2014-cü il yanvar ayının 1-i vəziyyətinə Ağsu şəhərində və 33 kənddə əhali təbii qazdan istifadə edir.
İçməli su təchizatının yaxşılaşdırılması ilə bağlı son illərdə mühüm layihələr həyata keçirilməsinə baxmayaraq hələ də 53 kənddə əhali təmizlənməmiş və zərərsizləşdirilməmiş sudan istifadə edir. Su mənbələri üzərində quraşdırılması nəzərdə tutulan 8 modul tipli sutəmizləyici qurğudan cəmi 2-nin tikintisi başa çatdırılmışdır. Su Kanal İdarəsi tərəfindən istehlak edilmiş suyun haqqının toplanması lazımınca təşkil edilməmiş və bu göstərici 2013-cü ildə 83 faiz olmuşdur.
Rayon İcra hakimiyyətinin təşkilatçılığı sayəsində son illərdə ümumtəhsil məktəblərinin göstəricilərində müəyyən irəliləyişlərə nail olunmuşdur. 2012-2013-cü dərs ilində 534 nəfər on birinci sinif məzununnun hamısı buraxılış imtahanlarında iştirak etmiş və attestat almışdır. Onlardan 90 nəfəri ali məktəblərə qəbul olunmuşdur. Məzunlardan 2 nəfəri 600, 6-sı isə 500 baldan yuxarı nəticə göstərmişdir.
2007-2008-ci tədris ilində rayonun ümumtəhsil məktəblərində 10824 şagird təhsil alırdısa ötən dərs ilində onların sayı 8587-yə enmişdir. Başqa sözlə, müqayisə olunan dövrdə əhalinin sayının 8,7 faiz artmasına baxmayaraq birinci-on birinci sinif şagirdlərinin sayı 2237 nəfər, yaxud 20,7 faiz azalmışdır. Son 1 ildə isə şagird kontingentində 162 nəfər aşağı düşmə faktı qeydə alınmışdır.
Təhlillər göstərir ki, təhsildən yayınmaya səbəb olan əsas amillər bir çox ailələrin qeydiyyat yerini dəyişmədən başqa şəhər və rayonlara köçmələri, eləcə də valideynləri tərəfindən qızların erkən yaşlarda məktəblərdən çıxarılmasıdır. Təkcə bu faktı söyləmək kifayətdir ki, ümumtəhsil məktəbini bitirən qızların sayı 2008-ci ildə 5507 nəfər idisə, ötən dərs ilində onların sayı cəmi 2784 olmuşdur.
Cari dərs ili üçün 84 vakant iş yeri barədə sifariş verilməsinə baxmayaraq cəmi 36 nəfər ixtisaslı müəllim müsabiqədən keçmişdir. Onlardan 35 nəfəri müxtəlif ixtisaslar üzrə işə qəbul edilmişlər.
Məktəblərin informasiya kommunikasiya texnologiyaları vasitələri ilə təminatı yüksək deyildir. Hazırda hər 100 şagirdə cəmi 4 kompyuter texnikası düşür. Heç də bütün məktəbdə internetə çıxış üçün müvafiq iş görülməmişdir. Mövcud 70 məktəbdən yalnız 12-də internetdən istifadə imkanları vardır.
Hazırda görülmüş işlərlə yanaşı ümumtəhsil məktəblərinin 64 faizi qəzalı vəziyyətdə olan, təmir tələb edən və yaxud uyğunlaşdırılmış binalarda fəaliyyət göstərir. Təhsil qanunvericiliyinə uyğun olaraq ümumtəhsil məktəblərinə qəbul məktəbəqədər uşaq tərbiyə müəssisələrindən aparılmalıdır. Bu sahədə də rayonda müəyyən problemlər qalmaqdadır. 8 mövcud məktəbəqədər uşaq tərbiyə müəssisələrində uşaq yerlərinin sayı hazırda birinci sinfə qəbul olunanların yarısından da azdır.
2013-cü ildə rayonda 1514 uşaq doğulmuş və əhali arasında 462 ölüm qeydə alınmışdır. Təbii artım 1052 nəfər olmüşdür.
Səhiyyə xidmətinin səviyyəsinin yaxşılaşdırılması üçün həyata keçirilən tədbirlərin həcminin artmasına baxmayaraq bu sahədə də bəzi nöqsanlar mövcuddur. Həkimlərlə və orta tibb işçiləri ilə təminat da qənaətbəxş deyildir. Hazırda rayonda pediatr, mama-ginekoloq, rentgenoloq və digər ixtisaslardan olan 54 həkimə və 71 orta tibb işçisinə ehtiyac vardır. Əhalinin hər 10000 nəfərinə 10,8 həkim və 36,6 orta tibb işçisi düşür ki, bu göstəricilər orta respublika göstəriciləri ilə müqayisədə xeyli aşağıdır.
Əvvəlki illərdə olduğu kimi dərman-sarğı materiallarının alınması işində problemlər qalmaqdadır. Bu məqsədlə 2013-cü ildə faktiki olaraq 395,2 min manat vəsaitdən istifadə olunmuşdur. Bu, hər bir rayon sakininə orta hesabla 5,33 manat dərman xərci deməkdir.
2008-ci ildən başlayaraq əhaliyə mədəni xidmətin göstərilməsi, yeniyetmə və gənclərin asudə vaxtlarının səmərəli təşkili, onların istedad və bacarıqlarının üzə çıxarılması, vətənpərvərlik ruhunda tərbiyə edilməsi məqsədilə rayonda Heydər Parkı, Qəhrəmanlar Parkı Abidə Kompleksi, Heydər Əliyev Mərkəzi, Uşaq Gənclər Bədii Yaradıcılıq mərkəzi, Heydər Əliyev Seyrəngahı tikilmiş, Ağsu şəhər Mədəniyyət və istirahət parkı, Tarix Diyarşünaslıq muzeyi və rayon Mədəniyyət sarayı yenidən qurulmuşdur.
Mərkəzləşmiş Kitabxana Sistemində veb saytı yaradılmış, elektron kataloq və elektron kitabxana yaradılması istiqamətində müəyyən işlər görülmüşdür. İndiyədək xüsusi proqram əsasında 115 mindən çox kitabın və dövri mətbuatın elektron kataloqu yaradılmışdır. 2013-cü ildə 3088 nüsxə kitab alınmışdır ki, bunun da 113-ü elektron nəşrlərdir. Hazırda Mərkəzləşmiş Kitabxana Sistemində kitab fondu 229,9 min nüsxə təşkiil edir. Bundan 54,8 min nüsxəsi, yaxud 24 faizi latın qrafikalıdır. İl ərzində 17861 oxucu kitabxana xidmətindən istifadə etmişdir.
Heydər Əliyev mərkəzinin işinin təkmilləşdirilməsi ilə ciddi nəzarətdə saxlanmalıdır. Azərbaycan Respublikası Prezidenti Administrasiyasının tövsiyələrinə və qrafikə uyğun olaraq bu il fevral-may aylarında Heydər Əliyev mərkəzində keçiriləcək dərslərdə rayon üzrə on birinci sinif şagirdlərinə Ulu öndər Heydər Əliyevin irsinin öyrənilməsi tədris olunacaqdır.
Hörmətli toplantı iştirakçıları,
2013-cü ildə Məşğulluq Mərkəzi tərəfindən rayonda 301 nəfər işaxtaran kimi qeydiyyata alınmışdır. İl ərzində 232 nəfər vətəndaş işə göndəriş alaraq işlə təmin olunmuşdur. Onlardan 64 nəfərini qadınlar, 67 nəfərini isə gənclər təşkil etmişdir. 17 nəfərə işsiz statusu verilərək müavinət təyin olunmuşdur.
Azərbaycan Respublikası regionlarının sosial-iqtisadi inkişafı Dövlət Proqramlarının icrasına həsr olunmuş konfransda dövlət başçısı cənab İlham Əliyev yekun nitqində korrupsiya və rüşfətxorluqla mübarizə sahəsindəki vəziyyətlə bağlı bildirmişdir ki; “Dövlət məmuru xalqın xidmətçisidir. Ona görə, mən bir daha bunu demək istəyirəm ki, növbəti illərdə də rüşvətxorluğa bulaşmış insanlar çox ciddi şəkildə cəzalandırılacaqlar. Kimsə nəticə çıxarmayıbsa, nəticə çıxarsın. Növbəti beş il ərzində Azərbaycan korrupsiyaya və rüşvətxorluğa qarşı mübarizədə də nümunəvi ölkə olmalıdır. ”
Hesabat ilində rayonumuzda da korrupsiya və rüşfətxorluqla mübarizə tədbirləri diqqət mərkəzində saxlanılıb. Belə ki, 2013-cü ildə rayon ərazisində müəssisə, idarə və təşkilat rəhbərlərinin hüquq və vəzifələrinin izahına dair mütəmadi görüşlər keçirimiş, baş verə biləcək neqativ halların, rüşvətxorluğun və korrupsiyanın qarşısını almaq üçün qabaqlayıcı tədbirlər görülmüşdür.
Hesabat ilində rayonda gənclərlə iş üzrə 38 rayon tədbiri keçirilmiş və bu tədbirlərdə 9352 nəfər iştirak etmişdir. Bundan başqa rayon gəncləri 155 nəfərlə 11 zona, 10 respublika tədbirində təmsil olunmuşlar.
2013-cü ildə 7 idman növü üzrə 32 rayon tədbiri keçirilmiş və bu tədbirlərdə 1599 nəfər idmançı iştirak etmişdir. Azərbaycan Respublikası Gənclər və İdman Nazirliyinin 2013-cü ilin təqvim planına əsasən keçirilən 8 zona və 15 respublika yarışlarında 154 nəfər idmançının iştirakı təmin olunmuşdur.
Ağsu futbol komandası Peşəkar futbol liqasının birinci Divizionu üzrə respublika çempionatında birinci yerə layiq görülmüşdür.
Ötən il Gənclər və İdman İdarəsi müxtəlif idman növləri üzrə açıq rayon çempionatları keçirmişdir. Bu çempionatlarda ətraf rayonların 16 komandası olmaqla, 194 nəfər idmançı iştirak etmişdir. Rayonumuzdan 43 nəfər idmançı bu yarışlarda iştirak edərək , müxtəlif çəki dərəcələri üzrə 12 nəfər birinci yerə, 10 nəfər ikinci yerə, 17 nəfər isə üçüncü yerə layiq görülmüşlər.
Bütün bunlarla yanaşı rayonda gənclər və yeniyetmələr üçün yaradılmış imkanlardan hələ lazımınca istifadə edilmir.
Rayonda poçt rabitəsinin keyfiyyətinin yaxşılaşdırılması istiqamətində müvafiq tədbirlər həyata keçirilmişdir. Lakin bu sahədə müəyyən nöqsanlar qalmaqdadır. Poçt rabitəsi sahəsində xidmətlər günün tələbləri səviyyəsində qurulmalı, xidmətlərin keyfiyyətinə təsir edən amillər aradan qaldırılmalı, əhaliyə müasir tələblər səviyyəsində xidmət göstərilməsi və normal iş şəraitinin yaradılması təmin edilməlidir.
Dövlət başçısı cənab İlham Əliyev tərəfindən 2013-cü ilin “İnformasiya-kommunikasiya texnologiyaları ili” elan olunması ilə əlaqədar rayon Telekommunikasiya Qovşağında müəyyən işlər görülmüşdür. Tarif gəliri 357,4 min manat təşkil etmişdir ki, bu 7,4 min manat, 2012-ci illə müqayisədə isə 2,1 faiz çoxdur.
Bununla yanaşı əvvəlki illərdə elektronlaşdırılmış ATS-lərin gücündən istifadə olunması və telefon şəbəkəsinin genişləndirilməsi sahəsində müəyyən nöqsanlara yol verilmiş, şəhər və kəndlərdə ATS-lərin montaj tutumundan səmərəli istifadə təmin edilməmişdir. Telefon rabitəsinin və sürətli internetin imkanlarından maksimum istifadə edilməli, müəssisənin texniki-istismar göstəricilərinin yüksəldilməsini təmin edən konkret tədbirlər həyata keçirilməlidir.
“Azərbaycan Respublikasında Hərbi Xidmətə Çağrışın əsasları haqqında” Azərbaycan Respublikası Qanununa uyğun olaraq 2013-cü ildə rayonda gənclərin ordu sıralarına hazırlanması, onların təkrar tibbi müayinədən keçirilməsi işinə diqqət artırılmış, hərbiyə yararlı çağrış yaşlı gənclərin əsgəri xidmətə yola salınması sahəsində müvafiq idarə və təşkilatların fəaliyyəti rayon İcra hakimiyyəti tərəfindən əlaqələndirilmişdir. Gənclərin ordu sıralarına yola salınması üzrə verilmiş tapşırıqlar bir qayda olaraq artıqlaması ilə yerinə yetirilmişdir.
Qanunçuluğun qorunması və ictimai asayışın mühafizə olunması daim diqqət mərkəzində saxlanılmışdır. Hüquq mühafizə orqanları tərəfindən həyata keçirilən səmərəli profilaktik tədbirlər nəticəində cinayətkarlıq və hüquq qaydalarının pozulması halları azalmışdır. İl ərzində rayon ərazisində cəmi 79 cinayət hadisəsi qeydə alınmışdır ki, bu 2012-ci illə müqayisədə 8 ədəd, yaxud 10,1 faiz azdır. Axtarışda olan cinayətkarların tutulması və cinayət törədən şəxslərin vaxtında müəyyən olunaraq məsuliyyətə cəlb edilməsi ilə bağlı məqsədyönlü işlər görülmüşdür. Hesabat ilində axtarışda olan 8 nəfərdən 7-si tutulmuşdur. Cinayətlərin açılması faizi 91,5 olmuşdur.
Bunlarla yanaşı nəqliyyatın hərəkətinin tənzimlənməsi sahəsində işlər narahatlıq doğurmaya bilməz. Yol hərəkəti qaydalarının kobud şəkildə pozulması nəticəsində ölən və yaralananların sayı artmışdır.
Hörmətli yığıncaq iştirakçıları,
Rayon İcra Hakimiyyətinin ötənilki fəaliyyətinin əsas istiqamətlərindən biri də vətəndaşların müraciətlərinə baxılması, onların qəbulunun təşkili olmuşdur. 2013-cü ildə rayon İcra hakimiyyətinə 880 vətəndaş müraciəti daxil olmuşdur ki, bu da 2012-ci illə müqayisədə 97 ədəd, yaxud 12,4 faiz çoxdur. Müraciətlərin 94-nü, yaxud 10,7 faizini əmək və əhalinin sosial müdafiəsi ilə bağlı məsələlər təşkil edir. 213 müraciət müsbət həll edilmiş, 44 müraciətdə göstərilənlər qismən təsdiq olunmuş, 56 müraciət isə əsassız sayılmışdır. 539 müraciətlə bağlı vətəndaşlara müvafiq izahatlar verilmişdir, 27 ərizədə qaldırılan məsələlər regionların sosial-iqtisadi inkişafına dair Dövlət Proqramında nəzərdə tutulmuş və 1 ərizə isə icra üçün aidiyyəti orqana göndərilmişdir.
Təhlil göstərir ki, Ağsu şəhərində, Kəndoba, Çaparlı, Növcü və Ərəbuşağı kənd inzibati ərazi dairələrindən daxil olan müraciətlərin sayı çoxluq təşkil etmişdir.
Rayon icra hakimiyyəti başçısının yerlərdə keçirilən səyyar görüş-qəbullar əhali tərəfindən razılıqla qarşılanır, onların arzu və istəklərinin öyrənilməsində müstəsna rol oynayır. Ötən il təsdiq olunmuş qrafik əsasında ayrı-ayrı yaşayış məntəqələrində keçirilmiş 44 görüş-qəbulda 3274 vətəndaş iştirak etmiş, onlar tərəfindən 175 məsələ qaldırılmışdır.
1 yanvar 2014-cü il tarixə olan vəziyyətdə rayon icra hakimiyyətində və ərazi icra nümayəndəliklərində 113 nəfər dövlət qulluqçusu çalışmışdır ki, onlardan da 105 nəfəri inzibati vəzifə tutan dövlət qulluqçularıdır. Dövlət qulluqçularından 5 nəfəri qadındır. Onlardan da 2 nəfəri 30 yaşadək gənclər sırasından olan dövlət qulluqçularıdır.
Hörmətli yığıncaq iştirakçıları,
2014-cü ildə və qarşıda çox mühüm vəzifələr dayanır. Qarşıdakı illər üçün qəbul ediləcək üçüncü Dövlət Proqramına uyğun olaraq rayonda sosial-iqtisadi inkişaf tədbirlərinin sürətləndirilməsi, əhalinin sosial müdafiəsinin gücləndirilməsi və sosial problemlərinin həllini nəzərdə tutan geniş miqyaslı işlər görüləcəkdir. Kənd təsərrüfatı məhsulları istehsalını artırmaq, sənaye, tikinti, nəqliyyat və rabitə müəssisələrinin fəaliyyətini müasir tələblər səviyyəsində qurmaq üçün məqsədli proqramlar həyata keçiriləcəkdir.
Yeni Azərbaycan Partiyası rayon təşkilatının İcra Aparatı üçün inzibati binanın inşasına başlanacaq, hər cür şəraitə malik müasir xəstəxana binasının tikintisində işlər davam etdiriləcək, mədəni-maarif müəssisələrinin maddi-texniki bazasının möhkəmləndirilməsi və xidmətin keyfiyyətinin yaxşılaşdırılması üçün əsaslı tədbirlər görüləcəkdir.
Dünya Bankı tərəfindən maliyyələşdirilən Ağsu şəhərinin su təchizatının yenidən qurulması və kanalizasiya sisteminin yaradılması layihəsinin icrası, şəhər və kənd yollarının təmiri və asfaltlaşdırılması davam etdiriləcəkdir.
Rayonun kəndlərində əhalinin, müəssisə və təşkilatların elektrik enerjisi ilə dayanıqlı təminatı üçün əsaslı təmir və yenidənqurma işləri aparılacaq və regionların sosial-iqtisadi inkişafına dair növbəti Dövlət Proqramı çərçivəsində yaşayış məntəqələrinin qazlaşdırılmasının sürətləndirilməsi üçün əlavə tədbirlər həyata keçiriləcəkdir.
Müəssisə, idarə və təşkilatlarda çalışanların iş şəraitinin yaxşılaşdırılması üçün imkanlardan tam istifadə ediləcəkdir.
Hörmətli toplantı iştirakçıları,
2013-cü ildə rayonumuzda görülən işlər və bu işlərin yerinə yetirilməsi istiqamətində rayon icra hakimiyyətinin, idarə, müəssisə və təşkilatların fəaliyyəti barədə Sizə qısa məlumat verdim.
2014-cü ildə qarşımızda daha mühüm vəzifələr durur.
Məruzəmin sonunda əminliklə bildirmək istəyirəm ki, Ağsu Rayon İcra Hakimiyyəti 2014-cü ildə də yeni uğurların əldə olunması, rayonumuzun daha dinamik inkişaf etdirilməsi istiqamətində fəaliyyətini genişləndirəcək, Azərbaycan Respublikasının Prezidenti cənab İlham Əliyevin göstəriş və tövsiyələrinin, eyni zamanda qanunvericiliklə üzərinə düşən vəzifələrin yerinə yetirilməsinin təmin edilməsi ilə bağlı lazım gələn bütün tədbirləri həyata keçirəcəkdir.
Hörmətli yığıncaq iştirakçıları,
İcazə verin Azərbaycan Respublikasının Prezidenti cənab İlham Əliyevi əmin edim ki, ağsulular bundan sonra da respublikada bütün sahələrdə aparılan sürətli inkişaf tədbirlərindən kənarda qalmayacaq, qarşıya qoyulan vəzifələrin uğurla həll edilməsi üçün bütün imkanlardan tam və səmərəli istifadə edəcəklər.
Diqqətinizə görə təşəkkür edirəm.
Məruzə ətrafında müzakirə aparılmış, rayonda fəaliyyət göstərən aidiyyəti dövlət orqanlarının rəhbərləri çıxış etmiş, fəaliyyətlərində mövcud nöqsanlar və onların aradan qaldırılması, işin keyfiyyətinin yüksəldilməsi tədbirlərindən söz açmışlar, ictimayətin nümayəndələri isə təklif və tənqidi qeydlərini səsləndirmişlər.
Hesabat yığıncağında, həmçinin Azərbaycan Respublikası Prezidenti Administrasiyasının məsul işçisi Niyaz Əliyev və Milli Məclisin deputatı Ərəstun Cavadov çıxış etmişlər. Çıxışlarda diqqət Prezident İlham Əliyevin sədrliyi ilə Nazirlər Kabinetinin 2013-cü ilin sosial-iqtisadi inkişafının yekunlarına və 2014-cü ildə qarşıda duran vəzifələrə həsr edilmiş iclasında qarşıya qoyulan konkret vəzifələrə yönəldilmişdir.Sonda yığıncaq iştirakçıları adından ölkə Prezidentinə müraciət qəbul edilmişdir.
