Şriftin ölçüsü :

Saytın rəngi :

Ağsu rayonun 18 yaşayış məntəqəsinin içməli su problemi həll edilib

04 dekabr 2017 | 11:00

“Əhalinin içməli su ilə təminatının yaxşılaşdırılmasına dair əlavə tədbirlər haqqında” Azərbaycan Prezidentinin 2017-ci il 17 mart tarixli Sərəncamına uyğun olaraq, 170 kənddə icra olunan layihələrin böyük hissəsi uğurla yekunlaşıb.
Layihələrin yekunlaşmasına və kəndlərə içməli suyun verilməsinə həsr olunmuş ilk açılış mərasimi Ağsu rayonunun Padar kəndində keçirilib.
   Tədbirdə çıxış edən Ağsu rayon İcra Hakimiyyətinin başçısı Ənvər Seyidəliyev bölgələrdə həyata keçirilən infrastruktur layihələrinin əhəmiyyətindən danışaraq qeyd edib ki, Ağsu şəhərinin içməli su problemi həll edildikdən sonra, belə layihələrin icrası kəndlərdə də davam etdirilir. Kəndlərin içməli su probleminin həll edilməsi mühüm hadisədir və sakinlərin məişət şəraitinin yaxşılaşdırılmasına xidmət edir.
   “Azərsu” ASC-nin “Birləşmiş Sukanal” MMC-nin direktoru Ramin Sadıqov əhalinin içməli su ilə təminatının yaxşılaşdırılması məqsədilə həyata keçirilən layihələr barədə məlumat verib. Bildirib ki, sərəncama əsasən, respublikanın 28 rayonunun 170 kəndində layihə icra olunub. Bu layihələrdən, ümumilikdə, 271 min kənd sakini faydalanacaq: “Cari ilin may-iyun aylarından kəndlərdə tikinti-quraşdırma işlərinə başlanılıb və indiyədək işlərin 95 faizi icra edilib. Bu gün açılış mərasimi keçirilən Padar kəndinin su təchizatının yaxşılaşdırılması məqsədilə 1,6 kilometr kənddaxili su xətti çəkilib, 12 bulaq quraşdırılıb. Növbəti illərdə Ağsu rayonunun su çatışmazlığı müşahidə olunan digər kəndlərində də belə layihələrin həyata keçirilməsi üçün araşdırmalar aparılır”.
   Tədbirdə çıxış edən kənd sakinləri bildiriblər ki, indiyədək içməli suya olan tələbatlarını əsasən, çay suları və bulaqlar hesabına ödəyirdilər. Çay sularının uzaq məsafədən daşınması, bulaqlarda isə sululuğun azalması ciddi çətinliklərə səbəb olurdu. Sakinlər bu sahədəki problemlərin həllinə göstərilən diqqət və qayğıya görə Prezident İlham Əliyevə minnətdarlıqlarını bildiriblər.
   Ağsu rayonunda icra olunan layihə 20 yaşayış məntəqəsini - Padar, Ərəbmehdibəy, Gəgəli, Qasımbəyli, Növcü, Yuxarı Növcü, Məlikçobanlı, Hacıqədirli, Ərəbsarvan, Axundlu, Gursulu, Kalağaylı, Nəmirli, Bənəcik, Göydəlləkli, Xəlilli, Qaraməmmədli, Navahı, Ülgüc və Bico kəndlərini əhatə edir. Layihəyə əsasən, 18 kəndə içməli suyun Külüllü mənbəyindən, Bico və Gəgəli kəndlərinə isə digər mənbələrdən verilməsi nəzərdə tutulub. İndiyədək 18 kənddə layihənin icrası yekunlaşıb, içməli suyun verilməsinə hazırlıq görülür.    Rayonun Bico kəndində tikinti-quraşdırma işləri ilin sonuna qədər tam başa çatdırılacaq. Gəgəli kəndində isə sutəmizləyici qurğunun və su anbarının inşasına hazırlıq görülür. Ümumilikdə bu kəndlərdə 33 kilometr su xətləri çəkilib, 119 bulaq quraşdırılıb. Prezidentin Sərəncamına əsasən “Azərsu” ASC-yə 14 milyon manat vəsait ayrılan layihələrin icrasından Ağsu rayonunun 20 kəndində 11 min nəfər sakin faydalanacaq.

Keçidlər