Uşaqlar günü münasibətilə tədbir keçirilib
1 İyun - Uşaqları Beynəlxalq Müdafiə günü münasibətilə “Şəlalə” şadlıq sarayında Ağsu Rayon İcra Hakimiyyəti Təhsil İşçiləri Həmkarlar İttifaqı Ağsu rayon Təşkilatı ilə birlikdə bayram tədbiri keçirib.
Rayonun ümumtəhsil və məktəbəqədər tərbiyə müəssisəsindən 110 nəfərdən çox uşağın qatıldığı tədbirdə Ağsu Rayon İcra Hakimiyyəti başçısının müavini, İctimai-siyasi və hümanitar məsələlər şöbəsinin müdiri Sevil Mirzəliyeva, Təhsil İşçiləri Həmkarlar İttifaqı Ağsu rayon Təşkilatının nümayəndələri və RİH başçısı Aparatının müvafiq struktur bölmələrinin məsul şəxsləri iştirak ediblər.
Tədbirdə, BMT Baş Assambleyasının 1950-ci il iyunun 1-də təşkil etdiyi Qadınların Beynəlxalq Konfransında uşaq hüquqlarının təmin edilməsi ilə bağlı təkliflər səsləndiyi və elə həmin konfransda da 1 iyun gününü uşaqların müdafiəsinə həsr etmək qərara alındığı, bundan sonra 1 iyun gününün Uşaqların Beynəlxalq Müdafiəsi günü kimi təsis olunduğu bildirilib.
Azərbaycanda ulu öndər Heydər Əliyevin uşaqlara, gənc nəslə təkrarsız qayğıkeşliyindən yoğrulan və bütün uşaqların xoşbəxt, firavan böyüməsinə xidmət edən fəal siyasət möhtərəm Prezidentimiz cənab İlham Əliyev tərəfindən yüksək səviyyədə davam etdirilir. Həmçinin Azərbaycan BMT-nin 1989-cu ildə qəbul etdiyi Uşaq Hüquqları Konvensiyasına qoşulan və bununla bağlı qarşısında duran öhdəlikləri uğurla yerinə yetirən ölkələrdən biridir. Azərbaycanda uşaqların təhsili, sosial problemlərinin aradan qaldırılması, sağlamlığı və mənəvi inkişafı, hüquqlarının müdafiəsi, şəxsiyyət kimi formalaşmaları məqsədilə mühüm dövlət proqramları qəbul edilərək layiqli tərzdə icra olunur.
Azərbaycanda gələcəyimiz olan uşaqlarla bağlı dövlət siyasəti daim güclənməkdədir. Bu məqsədlə Azərbaycan Prezidenti İlham Əliyev tərəfindən mühüm sənədlər imzalanır, ölkəmizdə uşaqlar hərtərəfli diqqət və qayğı ilə əhatə olunur.
Eyni zamanda, son illərdə Heydər Əliyev Fondunun dəstəyi ilə sosial xidmət müəssisələrində müasir tələblərə uyğun şərait yaradıldığı, internat evlərində bütün bayramlar, əlamətdar günlər münasibətilə şənliklər təşkil edildiyi, uşaqlara fərəhli duyğular bəxş olunduğu və xoş anlar yaşadıldığı qeyd olundu.
Bayram şənliyinin sonunda bütün uşaqlara hədiyyələr verildi.
