Ağsu rayonunun Qəşəd kəndində yeni məktəb binasının açılış mərasimi keçirilmişdir
Aprelin 30-da ümummilli lider Heydər Əliyevin 90 illik yubileyi münasibətilə rayonda keçirilən silsilə tədbirlər çərçivəsində Qəşəd kənd tam orta məktəbi üçün 180 şagird yerlik yeni binanın açılış mərasimi keçirilmişdir.
Mərasimdə rayon icra hakimiyyətinin başçısı Ənvər Seyidəliyev, bir sıra idarə, müəssisə və təşkilat rəhbərləri, rayon ziyalıları, habelə kənd sakinləri iştirak etmişlər.
Ilk öncə Azərbaycan Respublikasının Dövlət himni səsləndi.
Tədbiri giriş sözü ilə rayon icra hakimiyyətinin başçısı Ənvər Seyidəliyev açaraq ulu öndər Heydər Əliyevin Azərbaycana rəhbərlik etdiyi dövrlərdə təhsilin inkişafına, onun maddi-texniki bazasının möhkəmləndirilməsinə göstərdiyi diqqət və qayğıdan ətraflı danışdı.
Ulu öndəriin bu sahədə gördüyü işləri bu gün Prezident İlham Əliyevin uğurlu davam etdirdiyini diqqətə çatdıran Ə.Seyidəliyev Dövlət Proqramları çərçivəsində Ağsu rayonunda 3930 şagird yerlik 18 yeni məktəb binasının tikilib istifadəyə verildiyini, hazırda daha 4 kənddə təzə tədris ocaqları inşa olunduğunu vurğuladı.
Çıxışlarda təhsilin inkişafına göstərdikləri diqqətə görə ulu öndər Heydər Əliyevə, onun siyasi varisi Prezident İlham Əliyevə minnətdarlıq ifadə olundu.
Mərasimin axırında rəmzi qırmızı lent kəsildi, qonaqlar yeni binanı gəzərək yaradılmış şəraitlə tanış oldular.
