Heydər Əliyev Mərkəzində keçirilən açıq dərslər başa çatıb

 Ağsudakı Heydər Əliyev Mərkəzində rayonun ümumtəhsil məktəblərinin  XI sinif şagirdləri üçün tədris olunan ümummilli liderimiz Heydər Əliyevin həyat və fəaliyyəti, onun hakimiyyəti illərində quruculuq və abadlıq işlərinin aparılması, xalqa, dövlətə diqqət və qayğısı  və sair mövzulardakı açıq dərslər başa çatıb.
   Yekun məşğələsində Ərəbuşağı, Təklə, Kəndoba, Ləngəbiz  tam orta məktəblərindən ümumilikdə 52 nəfər şagird iştirak edib.  Aratkənd kənd  tam orta məktəbinin tarix müəllimi Taleh Şikarov yekun dərsi canlı ünsiyyət, şagirdlərin yüksək fəallığı  şəraitində keçib. Ümummilli Liderimizin uşaqlıq və gənclik illəri ilə bağlı məlumatları diqqətlə dinləyən məktəblilər Ulu Öndərin həyatının Moskvadakı dövrü, Azərbaycanın müstəqilliyi və dövlət quruculuğu dövründəki gərgin və əvəzsiz xidmətləri barədə bilgilərə böyük maraq göstəriblər.  Bu da təbii ki, böyük lider, görkəmli dövlət və siyasi xadim Heydər Əliyevin ötən əsrin 90-cı illərin əvvəllərində erməni təcavüzü şəraitində, çətin duruma düşən Azərbaycanda müstəqil dövlət quruculuğu sahəsindəki fəaliyyəti ilə bağlı idi.
  Məktəblilər 1999-cu il sentyabrın 20-də bağlanan “Əsrin müqaviləsi” ilə iqtisadi dirçəlişin əsasının qoyulması, Azərbaycanda hüquqi və demokratik dövlət quruculuğunun həyata keçirilməsi, sosial siyasət, təhsil siyasəti barədə məlumatları böyük maraqla dinləyiblər.  Vurğulanıb ki, məhz Ulu Öndərin, daha sonra   onun davamçısı Prezident İlham Əliyevin uzaqgörən siyasəti, məqsədyönlü fəaliyyətləri nəticəsində bu gün       Azərbaycan regionun ən qüdrətli ölkəsidir.
Açıq dərsdə şagirdləri maraqlandıran suallar  ətraflı cavablandırılıb.
Sonda məktəblilər Heydər Əliyev Mərkəzi ilə tanış olublar. Burada onlar Ulu Öndərin həyat və fəaliyyəti ilə bağlı fotoşəkillər və sənədlər barədə məlumatlandırılıblar.