Ağsu rayonunda 2015-ci ilin 9 ayının sosial-iqtisadi inkişafının yekunları müzakirə edilmişdir

Bu il Ağsuda 34289 hektar sahədən 119,1 min ton, ötən ildəkindən 49,4 min ton çox taxıl götürülüb. Hər hektardan orta məhsuldarlıq 15,7 sentner artaraq 34,7 sentnerə çatıb. Bu isə ölkə üzrə göstəricidən təxminən 4,7 sentner çoxdur.
Bu  barədə cari ilin doqquz ayında rayonda sosial-iqtisadi inkişafın yekunları və qarşıda duran vəzifələrə həsr olunan hesabat yığıncağında məlumat verilib.
Hesabat yığıncağında digər sahələrdə əldə olunan uğurlardan da danışılıb. Bildirilib ki, Ağsuda geniş tikinti-quruculuq və abadlıq işləri həyata keçirilir. Bu il sentyabrın 17-də rayona səfəri zamanı Prezident İlham Əliyevin açılışında iştirak etdiyi içməli su şəbəkəsi, idman kompleksi, YAP rayon təşkilatı üçün yeni bina, əsaslı şəkildə yenidən qurulan şahmat məktəbi, habelə hazırda inşa olunan kənd təsərrüfatı üçün inzibati bina, “Az-Qranata” MMC-nin şərab emalı zavodunda yeni süzmə sexi və soyuducu anbar, 100 yerlik uşaq bağçası-körpələr evi və s. məhz bu tikililərdəndir. Doqquz ayda rayonda tikinti-quraşdırma işlərinin həcmi 16 milyon 8,6 min manat, əsas kapitala yönəldilən investisiyalar 17 milyon 9 min manat təşkil edib.
Yığıncaqda heyvandarlıq, eləcə də bostan-tərəvəzçilik sahələrində əldə olunan müsbət nəticələr də diqqətə çatdırılıb. Bildirilib ki, hesabat dövründə ümumi məhsul buraxılışının həcmi ötən illə müqayisədə 10,8 faiz artıb və 124 milyon 509 min manata bərabər olub.
Həmçinin qeyd olunub ki, yaşayış məntəqələrinin qazlaşdırılması istiqamətində də mühüm addımlar atılıb, doqquz ayda 9 kəndə təbii qaz verilib, hazırda daha 3 kənd qazlaşdırılır.
Yığıncaqda təhsil, səhiyyə, mədəniyyət sahələrində də xeyli işlərin görüldüyü, əhalinin fasiləsiz elektrik enerjisi və su təchizatı ilə təminatı istiqamətində mühüm layihələrin reallaşdırıldığı bildirilib.
Məruzə və çıxışlarda qarşıda duran təxirəsalınmaz vəzifələrdən də ətraflı bəhs olunub.