Şəhid Fətəlizadə Rüfət Nazim oğlunun xatirəsinə həsr olunmuş boks turniri keçirilmişdir
Ağsu rayon Gənclər və İdman idarəsi və “Neftçi” İdman Klubu İctimai Birliyinin birgə təşkilatçılığı ilə rayonda şəhid Fətəlizadə Rüfət Nazim oğlunun xatirəsinə həsr olunmuş boks turniri keçirilmişdir. İki gün davam edən yarışlarda yeniyetmələr, kadetlər və uşaqlar, ümumilikdə 75 nəfər öz qüvvələrini sınamışlar.
Turnir iştirakçıları əvvəlcə Şəhidlər xiyabanına gələrək Qarabağ uğrunda döyüşlərdə şəhid olmuş R.Fətəlizadənin məzarını ziyarət etmiş, məzarı üzərinə əklil, gül və çiçək dəstələri qoymuşlar. Ağsu İdman Kompleksində davam edən tədbiri açan rayon icra hakimiyyətinin başçısı Ənvər Seyidəliyev Azərbaycan Prezidenti cənab İlham Əliyevin rəhbərliyi və nəzarəti altında ölkədə idmanın inkişafı və kütləviliyinin artırılması sahəsində aparılan işlərdən danışmışdır. Bu sahədə rayonda da mühüm işlərin görüldüyünü qeyd edərək yarış iştirakçılarına müvəffəqiyyətlər arzulamışdır
Sonra yarışlara start verilmişdir. “Təhsil“ Respublika İdman Mərkəzinin baş məşqçisi Mübariz Əliyevin baş hakimlik etdiyi yarışlarda Ağsu rayonu ilə yanaşı Bakı Respublika İdman Mərkəzi, Gəncə, Mingəçevir, Şirvan şəhərləri, Abşeron, Balakən, Zaqatala və Tərtər rayonları 8 komanda ilə təmsil olunmuşlar.
Sonda müxtəlif çəki dərəcələrində qaliblərə Ağsu rayon Gənclər və İdman idarəsinin diplomları təqdim olunmuşdur.
.JPG)
